珠光寶氣

12.5.17 | , , 10 Comments
個blog荒廢咗咁耐,又係時候嚟打掃一下,其實我^_^有好多嘢想寫,不過成日比我偉大嘅網購事業阻住咗,正所謂一入淘門深似海,每日都要去淘寶"巡視業務",除咗淘寶,重有Amazon、Gmarket、iHerb同樂天。攪到每個月收到statement要快手鬼鼠收埋,如果比妹豬爸發現,肯定佢會即時變身做"常哦"!

扯到去九里遠,返番入正題先。自懂事新年時妹豬伯娘送咗set珠寶玩具過佢哋之後,自此就勾起佢哋嘅公主心,兩個成鬼日攞嘅首飾出嚟戴,貴婦上身咁,唔知重以為自己去咗珠寶展。


身為阿媽嘅我雖然十萬個不情願見到佢哋有變公主之心,但愛女情切,亦唯有無耐接受,見佢哋玩嚟玩去都係嗰套,重買多咗套比佢哋替換,不過我買得嘅,當然無咁"隆重" ,以免佢哋嘅"高貴"造型嚇親街坊。

過咗一排,妹豬唔知响邊度學番嚟,成日話要裝扮化妝,嗰期慈母上身嘅我,二話不說即刻走去買比佢,結果屋企由珠寶展變咗做化妝教室,見佢兩個拎住啲玩具搽呢搽路,真係無眼睇。經過今次之後,下次做慈母之前,認真要停一停、諗一諗,以免自己後悔。












戒片(半)成功

18.4.17 | 10 Comments
自從細佬走咗之後,一直都好痛,但當辦完佢嘅後事,唔知點解突然釋懷、心情平靜咗好多,以後佢同仔仔可以自由自在響彩虹橋四圍跑。呢段時間真係好多謝妹豬爸,治癒咗我唔少嘅傷痛!

講返啲開心嘢,就係妹豬妹差不多可以搣甩尿片,話說想當年係妹豬有日突然話要著底褲唔著片,就係咁就戒咗片,重連夜片都戒埋,所以我係毫無幫小朋友戒片嘅經驗,前排正當我開始煩惱緊點幫妹豬妹響9月開學前戒片之際,妹豬妹突然變得好怕條片濕,一濕咗佢就要即刻換,過多幾日更突然同我講要去wee wee,自此之後就甚少失手,夜晚同佢著片,大多數第二朝都係乾(除咗臨瞓飲多咗水),睇嚟真係只要佢ready,就好快可以戒到。不過為咗安全起見,依家都有同佢著學習褲,過多排如果佢重係記錄良好,就可以正式宣布戒片成功!!!

淑女變生番

10.4.17 | , 3 Comments
究竟係4、5呢個年紀一般會"活潑"啲,還是妹豬唔知受咗咩刺激,佢由一個斯文、文靜嘅小朋友,變咗個跳跳紮、無時停嘅生番...

以前嘅佢真係好文靜,平時最常做嘅嘢就係睇書,一日到黑就叫我讀書比佢聽,文靜到我有啲擔心佢返學會唔會因為太靜,無同學肯同佢玩,但自從返咗k1之後,就慢慢地變得"活潑"起嚟,依家更加係無時停,個屁股好似有針拮,成日擒高擒低。自己玩都重未夠,教埋個妹,兩個日日都好似特技表演咁。

不過講到最可憐,莫過於係妹豬爸,當佢一坐響梳化,就會成為兩姊妹嘅目標,當正佢係人肉攀爬架,每次見到佢哋三個"玩",都睇到我突眼兼滴汗,好彩我醒目一早同咗生番姊妹花講明我係一磚豆腐,大力啲都會撞散,至可以逃過一劫!!!



一睇佢個笑容就知已經鎖定目標...

進攻.....


妹豬妹K1大作戰

14.3.17 | , 9 Comments
隨住最後一間出結果,妹豬妹嘅k1戰亦隨之結束。今次呢戰,心情好似坐過山車一樣,之所以攪到自己咁不安,全因爲懶之過。

細佬...一路好走

2.3.17 | 7 Comments
好耐都無寫blog,估唔到再提筆時居然喊住咁寫.....

尋朝起身預備早餐比妹豬佢哋,突然收到妹豬婆婆電話話細佬走咗,聽到嗰刻完全接受唔到,個腦不停浮現返以前嘅畫面,而啲眼淚好似停唔到咁,雖然佢已經好老,唔多願郁,但明明前幾日上去同佢沖涼,嗰時重好好胃口,不停食零食,又跟住我周圍行,點解幾日後會走得咁突然。

前幾日至同妹豬爸講,等9月兩姊妹一齊返學,我就可以成日去搵細佬,點解佢唔等我就走咗?! 不過我知道佢都唔想,要怪就怪我自己自私,掛住湊妹豬兩姊妹而冷落佢,重要送佢去妹豬婆婆度住。

呢兩晚都係喊到攰至瞓得著,個心真係好痛好痛,希望佢響彩虹橋同仔仔相遇番,兩個開開心心咁小天使,媽媽永遠愛你哋!